प्रहरी श्रीमती संघ र मेघा अस्पतालबीच उपचारमा छुटसम्बन्धी सम्झौता
२३ मंसिर २०७९ १५:५०
नेपाल प्रहरी श्रीमती संघ र ललितपुर महानगरपालिका–३ धोबीघाटस्थित मेघा अस्पताल प्रालिबीच बहालवाला प्रहरी कर्मचारी परिवार, अमर प्रहरी परिवार तथा पूर्व प्रहरी कर्मचारी र तिनका आश्रित परिवारलाई उक्त अस्पतालमा उपलब्ध स्वास्थ्य उपचार सेवामा छुट प्रदान गर्नेसम्बन्धी सम्झौतापत्रमा हस्ताक्षर भएको छ ।
नेपाल प्रहरी श्रीमती संघको तर्फबाट संघकी अध्यक्ष कुसुमलता सिंह र मेघा अस्पतालको तर्फबाट अस्पतालका अध्यक्ष किशोरजंग राणा र चिकित्सा निर्देशक डा. ईवराज सिम्खडाले संघको कार्यालय भृकुटीमण्डपमा शुक्रबार आयोजित कार्यक्रममा उक्त सम्झौतापत्रमा हस्ताक्षर र सम्झौतापत्र आदानप्रदान गरेका हुन् ।
कार्यक्रममा संघकी अध्यक्ष सिंहले शान्ति सुरक्षा तथा अपराध नियन्त्रणको अतिरिक्त प्राकृतिक प्रकोप, आपदविपदमा समेत आफ्नो ज्यानको पर्वाह नगरी सेवामा खटिएका प्रहरी कर्मचारी, अमर प्रहरी तथा पूर्व प्रहरी कर्मचारीहरूले पुर्याएको योगदानको उच्च मूल्याङ्कन गरी अस्पतालमा स्वास्थ्य उपचार तथा औषधिको लागि छुट दिने गरी भएको सम्झौता प्रति कृतज्ञता व्यक्त गरिन् । साथै उनले आगामी दिनमा समेत संघ र अस्पतालबीचको सहकार्य र समन्वय भइरहने बताइन् ।
सो अवसरमा अस्पतालका अध्यक्ष राणाले नागरिक सुरक्षामा खटिने प्रहरी कर्मचारी तथा प्रहरी कर्मचारीका परिवारलाई अस्पतालबाट प्रदान हुने स्वास्थ्य सेवा लाभदायी हुने विचार व्यक्त गर्दै आगामी दिनमा समेत अस्पताल र संघबीच आवश्यक सहकार्य हुने बताए ।
उक्त सम्झौताअनुसार अस्पतालको सेवा सुविधाअन्तर्गत आईसीयू बेड, वार्ड बेड, क्याबिन रूम, ल्याब र एक्स–रेमा ५० प्रतिशत छुट, ओपीडी डाक्टर, आईसीयू वार्ड तथा क्याबिन वार्ड डाक्टर राउण्ड, ओटी अपरेशन र डाक्टरले दिने सुविधामा ३० प्रतिशित र फार्मेसी औषधिमा १५ प्रतिशत छुट दिने उल्लेख गरिएको छ । साथै आर्थिक अवस्था कमजोर भई उपचार गराउन असमर्थ रहेको भनी सिफारिस भई आएमा वार्षिक ३ जनासम्मलाई अस्पतालले निःशुल्क उपचारको व्यवस्था गर्नेछ ।
सम्झौता आगामी मंसिर २३ गतेदेखि कार्यान्वयन भई २०८४ मंसिर २२ गतेसम्म ५ वर्षका लागि लागू हुनेछ ।
उक्त अवसरमा मेघा अस्पतालका पदाधिकारीहरू, श्रीमती संघका पदाधिकारीहरूलगायतको उपस्थिति रहेको थियो ।
सम्बन्धित समाचार
प्रतिक्रिया