परराष्ट्रमन्त्री पौड्याल श्रीलंका प्रस्थान
१९ माघ २०७९ १४:२१
परराष्ट्र मन्त्रालयले बुधबार आयोजना गरेको पत्रकार सम्मेलनमा परराष्ट्रमन्त्री डा. विमला राई पौड्याल मन्तव्य राख्दै। तस्बिर : किरणराज विष्ट/रासस
परराष्ट्रमन्त्री डा. विमला राई पौड्याल श्रीलंकाको ७५औं स्वतन्त्रता दिवसका अवसरमा आयोजित विशेष समारोहमा सहभागी हुन आज कोलम्बो प्रस्थान गरेकी छन्।
परराष्ट्रमन्त्री पौड्याललाई बन्दरानाइके इन्टरनेशनल विमानस्थलमा श्रीलंकाका सांसद परमिता बन्दरा तेनाखुनले स्वागत गर्ने कार्यक्रम रहेको छ।
मन्त्री पौड्याल आज साँझ श्रीलंकाका लागि नेपाली राजदूत बासुदेव मिश्रले आयोजना गर्ने रात्रि भोजमा सहभागी हुनेछिन्। यस अवसरमा उनले श्रीलंकामा रहेका नेपाली समुदायसँग अन्तरक्रिया गर्ने कार्यक्रमसमेत तय भएको छ।
मन्त्री पौड्यालले भोलि शुक्रबार श्रीलंकाका समकक्षीसँग भेटवार्ता गर्ने कार्यक्रम छ भने २१ माघमा श्रीलंकाका राष्ट्रपति रनिल विक्रमासिंघे र प्रधानमन्त्री दिनेश गुणवर्द्धनेसँग पनि शिष्टाचार भेटवार्ता गर्ने कार्यक्रम छ।
मन्त्री पौड्याल २२ माघमा स्वदेश फर्कने कार्यक्रम रहेको छ।
सम्बन्धित समाचार
प्रतिक्रिया