सात महिनासम्म बुझेनन् चिनियाँ राष्ट्रपति सीले राजदूत श्रेष्ठको ओहदाको पत्र

चिनियाँ राष्ट्रपति सी जिनपिङले सात महिना बितिसक्दा नेपाली राजदूत विष्णुपुकार श्रेष्ठकाे ओहदाको पत्र अहिलेसम्म नबुझेको राष्ट्रिय एकता अभियान अभियानले एक प्रेस विज्ञप्ति जारी गर्दै जनाएको छ ।

चीन र नेपालबीचको बलियो र गहिरो सम्बन्धको पृष्ठभूमिमा यो ढिलाइ गम्भीर चिन्ताको विषय र निकै निराशाजनक रहेको विज्ञप्तिमा उल्लेख छ ।

विज्ञप्तिमा भनिएको छ,‘पारस्परिक सम्मान र सहयोगको जगमा निर्माण भएको चीनसँगको सम्बन्धलाई नेपालले सधैं ठूलो महत्त्व दिएको छ । यो सम्बन्ध अन्तर्राष्ट्रिय मञ्चमा एकअर्कालाई समर्थनसहित धेरै तरिकाले प्रकट भएको छ । त्यसैले चीनले कूटनीतिक प्रोटोकलको उचित प्रकृया पालना नगरेको हेर्नु चिन्ताको विषय हो ।’

चीनलाई नेपालसँगको सम्बन्धको महत्त्वको स्मरण गराउँदै एकता अभियानका अध्यक्ष विनय यादवले थप ढिलाइ नगरी नेपाली राजदूतको ओहोदाको पत्र बुझिने कुरा सुनिश्चित गर्न तुरुन्तै कदम चाल्न आग्राह गरे । उनले प्रमाणपत्र बुझ्न भएको ढिलाइले दुई राष्ट्रहरूबीचको मित्रताको गहिरो बन्धनलाई कमजोर बनाउने बताए ।

विज्ञप्तिमा थप भनिएको छ,‘चीनले यस समस्यालाई सम्बोधन गर्न र हाम्रा देशहरूबीचको कूटनीतिक सम्बन्धलाई सुदृढ पार्न तत्काल र आवश्यक कदम चाल्नुपर्छ भन्ने हाम्रो दृढ विश्वास छ । नेपाल र चीनबीचको सम्बन्धलाई बलियो बनाउने पारस्परिक सम्मान र सहयोगको रक्षा गरिनुपर्छ र कूटनीतिक प्रोटोकल पालना नगर्दा यस सम्बन्धको अखण्डतालाई कमजोर बनाउँछ ।’