ट्विटरको हालको मूल्य २० अर्ब डलर, एलन मस्कले तिरेको आधाभन्दा कम
१३ चैत २०७९ १७:०३
एलन मस्कले ट्विटरको हालको मूल्य २० अर्ब अमेरिकी डलर रहेको बताएका छन् । यो मूल्य मस्कले पाँच महिनाअघि मात्र सोसल मिडिया प्लेटफर्मका लागि तिरेको ४४ अर्ब डलरको तुलनामा आधाभन्दा पनि कम हो ।
कर्मचारीहरूलाई पठाइएको ईमेलमा सान फ्रान्सिस्कोस्थित कम्पनीमा नयाँ स्टक क्षतिपूर्ति कार्यक्रम र ट्विटरको छाता कम्पनी ‘एक्स होल्डिङ्स’का कर्मचारीहरूलाई शेयर बाँडफाँड गरिएको उल्लेख गरिएको छ ।
क्षतिपूर्ति योजनाले ट्विटरको मूल्य २० अर्ब डलर तोकेको छ । यो मूल्य ‘स्न्यापच्याट’को मूल कम्पनी ‘स्न्याप’ (१८.२ बिलियन डलर) वा ‘पिन्टेरेस्ट’ (१८.७ बिलियन डलर) भन्दा केही मात्र बढी हो ।
टेस्ला इङ्क र एयरोस्पेस ग्रुप स्पेसएक्सका प्रमुख कार्यकारीसमेत रहेका मस्कले ट्विटरले आफ्ना कर्मचारीलाई हरेक छ महिनामा शेयर नगद गर्न अनुमति दिने बताएका छन् ।
आन्तरिक ईमेलमा मस्कले ट्विटरको मूल्यमा भएको क्रुर सङ्कुचनको वर्णन गर्दै उनले भनेका छन्, ‘ट्विटरले यस्तो गम्भीर वित्तीय कठिनाइहरूको सामना गर्नुप¥यो कि एक बिन्दुमा यो चरम आर्थिक सङ्कटको सङ्घारमा पुगेको थियो ।’
यसअघि मस्कले ट्विटरमा शनिबार पोस्ट गरेको एक सन्देशमा भनेका छन्, ‘ट्विटरले प्रतिवर्ष तीन अर्ब अमेरिकी डलर गुमाउने अनुमान गरिरहेको छ ।’
उनले वार्षिक १.५ अर्ब अमेरिकी डलरको राजस्वमा गिरावट र समान रकमको ॠण–सेवा बोझको हवाला दिएका थिए । ट्विटरका बहुसङ्ख्यक शेयरहोल्डर मस्कले भने, ‘कम्पनीको अवस्था अत्यन्तै डरलाग्दो स्थितिमा छ ।’
मस्कले आफ्नो नियन्त्रणमा लिएयता समूहको पेरोल सात हजार ५०० कर्मचारीबाट घटाएर दुई हजारभन्दा कममा झारेका छन् ।
उनले २५० अर्ब अमेरिकी डलरको मूल्याङ्कनका लागि ‘स्पष्ट तर कठिन बाटो’ देखेको एएफपीलाई प्राप्त ईमेलमा बताएका छन् ।
सम्बन्धित समाचार
प्रतिक्रिया