सरकारी वकिल कार्यालय काठमाडौंमा रवि लामिछानेको बयान शुरू

राष्ट्रिय स्वतन्त्र पार्टी (रास्वपा) सभापति रवि लामिछानेको जिल्ला सरकारी वकिल कार्यालय काठमाडौंमा बयान शुरू भएको छ । कास्की प्रहरीको हिरासतबाट काठमाडौं ल्याइएका पूर्व गृहमन्त्री समेत रहेका लामिछानेको आज (शुक्रबार) बाट बयान शुरू भएको हो । सहकारी ठगीको रकम अपचलन प्रकरणमा लामिछाने प्रहरी नियन्त्रणमा छन् ।

सरकारी वकीलको कार्यालयमा सरकारी वकिल र प्रहरी अनुसन्धान अधिकृतले बयान लिनेछन् । लामिछानेलाई काठमाडौंको स्वर्णलक्ष्मी सहकारी ठगीसँग सम्बन्धित रहेर थप बयानका लागि हिजो पोखराबाट काठमाडौं ल्याइएको थियो । स्वर्णलक्ष्मी सहकारीको बचत अपचलनको आरोपमा अनुसन्धानका लागि काठमाडौं जिल्ला अदालतले मंसिर २ गते लामिछानेविरुद्ध पक्राउ पुर्जी जारी गरेको थियो ।

कास्की जिल्ला अदालतले आइतबार लामिछानेलाई थप १५ दिन हिरासतमा राखेर अनुसन्धान गर्न अनुमति दिएको थियो। कास्कीमा लामिछानेमाथि सहकारी ठगी, संगठित अपराध र सम्पत्ति शुद्धीकरण सम्बन्धी कसुरमा अनुसन्धान भइरहेको छ । बुटवलको सुप्रिम सहकारीको बचत अपचलनमा पनि जोडिएका लामिछानेलाई यसअघि रूपन्देही जिल्ला सरकारी वकिल कार्यालयमा बयानका लागि लगिएको थियो । लामिछाने लगायतविरुद्ध चितवनमा पनि पक्राउ पुर्जी जारी भएको छ ।