पूर्व शिक्षामन्त्रीलाई केआईआईटीका रजिष्ट्रारको जवाफ, अनुसन्धान मै रहेको विषयमा सम्बेदनशील बनौं
१९ वैशाख २०८२ १५:३७
भारतको उडिसा राज्यस्थित कलिङ्गा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयका रजिष्ट्रार डा. जे.आर. मोहन्तीले नेपाली छात्रा प्रिशा साहको मृत्युबारे अनुसन्धान भइरहेको बताएका छन् ।
पूर्व शिक्षामन्त्री सुमना श्रेष्ठलाई सामाजिक सञ्जाल एक्समार्फत जवाफ दिँदै मोहन्तीले यस्तो बताएका हुन् ।
सुमनाले केआईआईटीजस्ता शैक्षिक संस्थाहरू हाम्रा विद्यार्थीका लागि सुरक्षित छन् ? भन्दै प्रश्न उठाएकी थिइन् ।
त्यसको जवाफमा मोहन्तीले भनेका छन्, ‘यो मामिला हाल प्रहरी अनुसन्धानमा छ । वरिष्ठ प्रहरी अधिकारीहरूले वैज्ञानिक टोलीसँगै तुरुन्तै प्रारम्भिक अनुसन्धान गरे र प्रक्रियाहरूलाई नजिकबाट निगरानी गरिरहेका छन् । केआईआईटीले अधिकारीहरूलाई पूर्ण सहयोग प्रदान गरिरहेको छ ।’
उनले अनुसन्धानमा रहेकाे विषयमा सम्बेदनशील भएर सूचना प्रवाहगर्न सबैमा अनुराेध समेत गरेका छन् ।
वीरगञ्ज घर भएकी साह बिहीबार मृत फेला परेकी थिइन् ।
प्रिसा मृत फेला परेको खबरपछि परराष्ट्र मन्त्रालयले छानबिनका लागि कूटनीतिक पहल थालेको छ । परराष्ट्रमन्त्री डा. आरजु राणा देउवाले हिजो नै भारत सरकार, ओडिसा सरकारका उच्च अधिकारीहरू र दिल्लीस्थित नेपाली दूतावासमार्फत घटनाको सत्य तथ्य छानबिन गर्न कूटनीतिक पहल थालेको जानकारी दिएकी छिन्।
भारतीय विदेश मन्त्रालयले प्रिशाको निधनलाई लिएर गहिरो शोक व्यक्त गरेको छ । उसले घटनाकाे अनुसन्धानमा पूर्ण सहयाेगका साथै घटनामा मन्त्रालय गंभिर भएर अनुसन्धान प्रक्रियाकाे अनुगमन गरिरहेकाे जनाएकाे छ ।
सम्बन्धित समाचार
प्रतिक्रिया