![Pardafas.com](https://www.pardafas.com/wp-content/uploads/2022/06/pardafas-logo.png)
भारतीय राष्ट्रपतिका लागि एनडीएकी उम्मेदवार बनिन् आदिवासी नेतृ द्रौपदी मुर्मु
![clock](https://www.pardafas.com/wp-content/themes/pardafas/assets/img/clock-icon.png)
![भारतीय राष्ट्रपतिका लागि एनडीएकी उम्मेदवार बनिन् आदिवासी नेतृ द्रौपदी मुर्मु](https://www.pardafas.com/wp-content/uploads/2022/06/indian-president-candidates-2022-1.jpg)
भारतीय जनता पार्टी (भाजपा) नेतृत्वको राष्ट्रिय लोकतान्त्रिक गठबन्धन (एनडीए) ले आगामी चुनावको लागि आदिवासी नेतृ द्रौपदी मुर्मुलाई राष्ट्रपतिको उम्मेदवार घोषणा गरेको छ ।
भाजपा अध्यक्ष जेपी नड्डाले मंगलबार आयोजित पत्रकार सम्मेलनमा मुर्मुलाई राष्ट्रपतिको उम्मेदवारको रूपमा सिफारिस गरेको बताए । आदिवासी नेतृ द्रौपदी मुर्मु झारखण्डको पूर्वराज्यपाल हुन् । निर्वाचित भएमा उनी भारतको पहिलो आदिवासी राष्ट्रपति र देशको दोस्रो महिला राष्ट्रपति बन्नेछिन् ।
‘पहिलोपटक महिला आदिवासी उम्मेदवारलाई प्राथमिकता दिइएको छ । हामी आगामी राष्ट्रपति चुनावका लागि द्रौपदी मुर्मुलाई एनडीएको उम्मेदवारको रूपमा घोषणा गर्छौं’, बीजेपी प्रमुख नड्डाले भने ।
मुर्मुले आफ्नो जीवन समाजको सेवा गर्न र गरिब, दलित र सीमान्तकृतहरूलाई सशक्तिकरण गर्न समर्पित गरेको उनले बताए । प्रधानमन्त्री नरेन्द्र मोदीले मुर्मुसँग राम्रो प्रशासनिक अनुभव भएको र उनी राष्ट्रपतिमा निर्वाचित हुनेमा आफू ढुक्क भएको बताएका छन् ।
‘ उनीसँग राम्रो प्रशासनिक अनुभव छ । उनी हाम्रो देशको महान राष्ट्रपति हुनेछिन् भन्नेमा म ढुक्क छु’, प्रधानमन्त्री मोदीले भनेका छन् ।
पछिल्लो २० वर्षदेखि भाजपामा आबद्ध उनी भाजपा महिला मोर्चाकी राष्ट्रिय उपाध्यक्षसमेत थिइन् ।
द्रौपदी मुर्मु विजयी भएमा भारतको पहिलो आदिवासी राष्ट्रपति र दोस्रो महिला राष्ट्रपति हुनेछिन् । यस्तै ओडिशाबाट पहिलो पटक राष्ट्रपति उम्मेद्वार अघि सारिएको छ । उनी झारखण्डको पहिलो महिला राज्यपाल समेत हुन्। उनी राज्यपाल नियुक्त हुने ओडिशाबाट पहिलो महिला र आदिवासी नेता थिइन ।
गरिब परिवारको व्यक्तिगत पृष्ठभूमि र सार्वजनिक सेवाको इतिहास नै उनको विशेषता हो । उनले आफ्नै गृह जिल्लाको रैरङपुरमा बिना तलब लामो समय अध्यापन गराएकी थिइन।
उनले प्रशासनिक कार्य र राजनीति दुबै अनुभव राख्ने नेताका रुपमा चर्चा कमाएकी थिइन् ।
प्रतिक्रिया