कलेक्टिभ रूपमा नेपालमा लगानी गर्न एनआरएनलाई वरिष्ठ उपाध्यक्ष ढकालको आग्रह

नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले कलेक्टिभ रूपमा नेपालमा लगानी गर्न गैरआवासीय नेपालीहरूलाई आह्वान गरेका छन् ।

गैरआवासीय नेपाली संघले बिहिबार राजधानीमा आयोजना गरेको वैदेशिक रोजगार, सामाजिक सुरक्षा, लगानी तथा वैदेशिक मुद्रा निक्षेपसम्बन्धी कार्यशालालाई सम्बोधन गर्दै वरिष्ठ उपाध्यक्ष ढकालले कोभिड–१९ महामारी तथा रुस–युक्रेन युद्धका कारण मुलुकमा वैदेशिक मुद्रा सञ्चितिमा संकुचन देखिएको बताउँदै यो नेपालभित्र विदेशी मुद्रा भित्र्याउने र लगानी विस्तार गर्ने उपयुक्त अवसर भएको बताए ।

“मुलुक अहिले वैदेशिक मुद्रा सञ्चितिको चापबाट गुज्रिएको छ । नेपालमा वैदेशिक मुद्रा भित्र्याउँदै लगानी विस्तारका लागि तपाईंहलाई यो उपयुक्त अवसर होे । प्रत्येक मुलुकको वा शहरको समूहहरू बनाई कलेक्टिभ रूपमा ठूलाठूला आयोजनाहरूमा लगानी विस्तार गर्नुहोस् । तपाईंले त्यहाँ गरेको लगानी र प्रतिफलभन्दा नेपालमा पक्कै पनि राम्रो हुनेछ,” उनले भने ।

उनले लगानी गर्न तथा प्रतिफल लैजान केही समस्या भए क्रमशः समाधान गर्दै जान नेपाल उद्योग वाणिज्य महासंघको तर्फबाट पहल गर्नेसमेत बताए ।

“नेपालमा लगानीको वातावरण बनाउन तथा तपाईंहरूको लगानीको प्रतिफल लैजान केही समस्या परेमा हामी तपाईंहरुसँगै हुनेछौं,” उनले भने, “यहाँहरूलाई आइपर्ने कुनै पनि समस्या समाधानका लागि समग्र निजी क्षेत्रको तर्फबाट आवश्यक पहल गर्ने म यहाँहरूलाई प्रतिवद्धतासमेत जनाउन चाहन्छु ।”

उनले नेपालको अर्थतन्त्रका केही सूचकहरू नकारात्मक रहे पनि नेपाल र श्रीलंकाको आर्थिक अवस्था तुलना गर्न नमिल्ने बताए ।

“नेपाल र श्रीलंकाको आर्थिक अवस्था तुलना गर्न मिल्दैन । श्रीलंका ठूलो विदेशी ऋणमा छ । हामी त्यस्तो अवस्थामा छैनौं,” ढकालले भने, “अर्को कुरा उनीहरूको भन्दा हाम्रो अर्थतन्त्रमा रेमिट्यान्स भूमिका फरक खालको छ । त्यसैले हामी कुनै पनि हालतमा श्रीलंका हुँदैनौं र त्यो बाटोमा पनि छैनौं ।”

आईपीओमा गैरआवासीय नेपालीहरूलाई १० प्रतिशत कोटा छुट्याउँदा यसले अहिलेको तरलता समस्या समाधान गर्न धेरै हदसम्म सहयोग पुगेको बताउँदै उनले नेपालमा गैरआवासीय नेपालीहरूको लगानी भित्र्याउन पनि यसबाट सहयोग पुग्ने अपेक्षा गरे ।

उनले नेपालमा सम्भावना नै सम्भावना रहेको र यसलाई अवसरका रूपमा लिन गैरआवासीय नेपालीहरूलाई आग्रहसमेत गरे ।

प्रतिक्रिया

Leave a Reply

Your email address will not be published.

ताजा खबर