लुम्बिनी विकास कोषभित्र रिसोर्ट सञ्चालन गर्न दिइएको अनुमति खारेज

लुम्बिनी विकास कोषभित्र रिसोर्ट सञ्चालन गर्न दिइएको अनुमति खारेज भएको छ ।

लुम्बिनी विकास कोष परिषद्का अध्यक्षसमेत रहेका संस्कृति, पर्यटन तथा नागरिक उड्डयनमन्त्री जीवनराम श्रेष्ठको अध्यक्षतामा मंगलबार बसेको परिषद् बैठकले अनुमति खारेज गर्ने निर्णय गरेको हो ।

लुम्बिनी क्षेत्रको गुरुयोजनाविपरीतको क्याम्पेन ग्राउण्डको जग्गा ‘संसारा वेलनेस’ नामक निजी कम्पनीलाई रिसोर्ट सञ्चालन गर्न दिने गत वैशाख १९ गतेको निर्णय खारेज भएकाे हाे ।

परिषद् बैठकले लुम्बिनीमा पर्यटक सुविधाका लागि विद्युतीय बस सञ्चालन गर्ने निर्णयसमेत गरेको छ । बैठकले एक महिनाभित्र विद्युतीय बस सेवा सञ्चालन गर्ने निर्णय गरेको बताइएको छ ।

लुम्बिनीमा जाने पर्यटकलाई सुविधायुक्त र सहज अवलोकनका लागि विद्युतीय बस सञ्चालनको निर्णय गरिएको मन्त्री श्रेष्ठले बताए । विद्युतीय बस सञ्चालनले सो क्षेत्रका पर्यटकीय सम्पदा अवलोकनमा जाने पर्यटकलाई सहज हुने अपेक्षा गरिएको छ ।