जर्मनीकी बीएमजेड विभाग प्रमुख सेफरले गरिन् नेपालको तीन दिने भ्रमण

जर्मनीको आर्थिक सहयोग तथा विकास मन्त्रालय (बीएमजेड) मा एसिया, दक्षिण एसियासँगको सहयोगसम्बन्धी नीतिगत मुद्दा विभागकी प्रमुख बार्बरा सेफरको नेतृत्वमा आएको प्रतिनिधिमण्डलले नेपालको तीन दिने भ्रमण गरेका छन्।

साउन १६ देखि १८ गतेसम्म नेपाल भ्रमण गरेका उनीहरूले त्यसबीच सरकारका विभिन्न मन्त्रालयका उच्च अधिकारीहरूसँग भेटवार्ता गरे। भ्रमणमा नेपाल र जर्मनीबीचको भविष्यमा हुने द्विपक्षीय विकास सहयोगबारे छलफल भएको थियो।

यसअघि जर्मनीका चान्सलर ओलाफ ओलाफ शुल्ज र नेपालका प्रधानमन्त्री शेरबहादुर देउवाबीच पत्र आदानप्रदान गरी दुई देशबीचको दीर्घकालीन विकास सहयोगलाई निरन्तरता दिने सहमति भएको थियो।

शेफरको नेतृत्वमा आएका जर्मन दूतावास, जीआईजेड र केएफडब्लूका अधिकारीहरूले परराष्ट्र मन्त्रालय, उद्योग, वाणिज्य तथा आपूर्ति मन्त्रालय, स्वास्थ्य तथा जनसंख्या मन्त्रालय, उर्जा, जलस्रोत तथा सिँचाइ मन्त्रालय, भूमि व्यवस्था, सहकारी तथा गरिबी निवारण मन्त्रालय तथा अर्थ मन्त्रालयका उच्च अधिकारीहरूसँग बैठक गरे ।

शेफरले राजनीतिक साझेदारहरूसँगको प्रेरणादायी छलफलबारे प्रकाश नेपालको तीन दिने भ्रमणले नेपाल र जर्मनीबीचको सम्बन्ध लामो र विश्वसनीय भएको पुनःस्थापित गरेको बताइन्। जर्मनीको अनुदान सहयोगले नेपाललाई अन्य कुराहरूका साथै जलवायुसम्बन्धी महत्त्वाकांक्षी राष्ट्रिय निर्धारण योगदान (एनडीसी) लाई सहयोग गर्ने र मध्यम आय भएको देश बन्ने बाटोमा सहजीकरण गर्ने उनको भनाइ छ ।

यसका साथै उनको तीन दिने भ्रमणमा जर्मनी र नेपालले स्वास्थ्य, सामाजिक सुरक्षा, दिगो आर्थिक विकास र गरिबी निवारणका क्षेत्रलाई भावी सहयोगका लागि सम्भावित क्षेत्रका रूपमा हेर्न सहमत भएका छन् ।

कार्यवाहक राजदूत डा. स्टेफान रुसेकले भने, ‘कोभिडको २ वर्षभन्दा बढी समयपछि जर्मन प्रतिनिधिमण्डलले अन्ततः नेपालका हाम्रा साझेदार मन्त्रालयहरूलाई व्यक्तिगत रूपमा भेट्न र हाम्रो सहयोगको भविष्यबारे छलफल गर्न पाएकोमा म खुसी छु। मलाई आशा छ कि यो हाम्रा दुई देशहरूबीचको सरकारी स्तरमा थप राजनीतिक आदानप्रदानको लागि सुरुवात बिन्दु हुनेछ।’

नेपाल र जर्मनीबीच ६० वर्षभन्दा लामो समयदेखिको द्विपक्षीय सहयोग रहेको छ । जर्मन विकास सहयोगले दिगो विकास लक्ष्य हासिल गर्न नेपालको प्रयासलाई सहयोग गर्दै आएको छ । कोभिड–१९ पश्चात् तत्काल ४० लाखभन्दा बढी कोभिड खोपलगायत अरू स्वास्थ्य सामग्री सहयोगसमेत जर्मनीले प्रदान गरेको थियो ।

सेप्टेम्बर २०२१ देखि जर्मनीले नेपाल सरकार र १७ विकास साझेदारहरूले अनुमोदन गरेको ग्रिडसम्बन्धी काठमाडौं घोषणापत्रमा हस्ताक्षर गरेअनुसार नेपालको हरित र समावेशी विकासको लक्ष्यलाई सहयोग र समर्थन प्रदान गरेको छ।

नेपालमा जर्मन द्विपक्षीय प्राविधिक सहयोग पुनर्निर्माणको लागि ऋण संस्थामार्फत वित्तीय सहयोग तथा अन्तर्राष्ट्रिय सहयोगका लागि जर्मन समाज (जीआईजेड) र राष्ट्रिय मापन विज्ञान संस्थानमार्फत प्राविधिक सहयोग गर्दै आएको छ।

जर्मनीले युरोपेली संघ र यसका सदस्य राष्ट्रहरूसँग धेरै नजिकबाट काम गर्दै आएको छ र जर्मनी संयुक्त राष्ट्र संघ, विश्व बैंक वा एसियाली विकास बैंकजस्ता धेरै बहुपक्षीय संस्थाहरूको प्रमुख योगदानकर्ता वा सरोकारवाला समेत हो।

प्रतिक्रिया

Leave a Reply

Your email address will not be published.

ताजा खबर