ठमेलकाे मनि एक्सचेन्ज सञ्चालकलाई अपहरण गरेर ३० लाख रुपैयाँ लुटपाट
२३ भदौ २०७९ १२:५१
काठमाडौंमा बुधबार राति एक अपरिचित समूहले मनि एक्सचेन्ज सञ्चालकलाई अपहरण गरेर ३० लाख रुपैयाँ लुटपाट गरेको छ।
बुधबार राति ७ः५५ बजे तीन वटा मोटरसाइकलमा सवार पाँच जना पुरुषहरूको अपरिचित समूहले ठमेलस्थित ओरिन्टेल मनि एक्सचेन्जका सञ्चालक प्रकाश श्रेष्ठलाई अपहरण गरी उक्त रकम लुटपाट गरेको प्रहरीले जनाएको छ।
काठमाडौं महानगरपालिका–१५ डल्लु पुल र टंकेश्वर पुलको बीचमा रहेको सो मनि एक्सचेन्जका सञ्चालक श्रेष्ठलाई अपहरण गरेर उक्त समूहले ठमेल म्हेपी हुँदै डल्लु लगेर श्रेष्ठसँग रहेको तीस लाख रुपैयाँ लुटपाट गरेको जिल्ला प्रहरी परिसर काठमाडौंका प्रवक्ता एसपी दिनेशराज मैनालीले जानकारी दिए।
लुटपाटपछि उक्त समूह फरार छ। उनीहरूले प्रयोग गरेका तीनमध्ये एउटा पल्सर २२० मोटरसाइकल बा ७९ प ८३२७ नम्बरको रहेको खुलेको छ। अन्य दुईमध्ये एउटा पल्सर २२० र अर्को नीलो जिक्सर मोटरसाइकल भन्ने मात्र खुलेको छ र ती मोटसाइकलको नम्बर भने खुलेको छैन।
घटनामा संलग्नहरूको खोजी भइरहेको र उनीहरू चाँडै पक्राउ पर्ने एसपी मैनालीले बताए।
सम्बन्धित समाचार
प्रतिक्रिया