चोरीका २१ वटा दुईपांग्रे सवारी साधन फेला पारी सम्बन्धित धनीलाई हस्तान्तरण
३१ असोज २०७९ १५:२२
काठमाडौं उपत्यका ट्राफिक प्रहरी कार्यालयले उपत्यकाका विभिन्न स्थानबाट चोरी भएका २१ वटा दुईपांग्रे सवारी साधन फेला पारी सम्बन्धित धनीलाई हस्तान्तरण गरेको छ ।
काठमाडौं उपत्यका ट्राफिक प्रहरी कार्यालयमा सोमबार आयोजित एक कार्यक्रमका बीच प्रहरी नायब उपरीक्षक सन्तोष रोकाले सवारी साधन सम्बन्धित धनीलाई हस्तान्तरण गरेका हुन् ।
दुईपांग्रे सवारी साधन चोरी भएको भनी काठमाडौं उपत्यका ट्राफिक प्रहरी कार्यालयमा सवारीधनीले विभिन्न मितिमा दिएको निवेदनका आधारमा खोजतलास गर्दा भेटिएका १५ वटा मोटरसाइकल र ६ वटा स्कुटर हस्तान्तरण गरिएको हो ।
गत साउनदेखि असोज ३० गतेसम्म दुईपांग्रे सवारी साधन चोरी भएको भनी काठमाडौं उपत्यका ट्राफिक प्रहरी कार्यालयमा ४०२ वटा निवेदन परेका थिए । प्राप्त निवेदनको आधारमा चोरी भएका सवारी साधन ट्राफिक प्रहरीले खोजी गर्दा १५९ वटा फेला परेका थिए ।
जसमध्ये साउन महिनामा ६८ वटा र भदौ महिनामा ३८ वटा सवारी साधन सम्बन्धित धनीलाई जिम्मा लगाइसकिएको ट्राफिक प्रहरीले जनाएको छ । यस्तै सोमबारसहित असोजमा ३२ वटा सवारी साधन सम्बन्धित धनीलाई बुझाइएको छ ।
असोज महिनामा चोरीको एउटा मोटरसाइकलसहित नियन्त्रणमा लिइएका एक जनालाई आवश्यक कारबाहीका लागि सम्बन्धित वृत्तमा पठाइएको प्रहरी नायब उपरीक्षक रोकाले बताए ।
सम्बन्धित समाचार
प्रतिक्रिया