![Pardafas.com](https://www.pardafas.com/wp-content/uploads/2022/06/pardafas-logo.png)
विश्वकपमा सट्टाबाजी गराएको आरोपमा अर्का एजेन्ट पक्राउ, १० करोड बढीको कारोबार
![clock](https://www.pardafas.com/wp-content/themes/pardafas/assets/img/clock-icon.png)
![विश्वकपमा सट्टाबाजी गराएको आरोपमा अर्का एजेन्ट पक्राउ, १० करोड बढीको कारोबार](https://www.pardafas.com/wp-content/uploads/2022/12/Sattabaji.jpg)
अनलाइन सट्टाबाजीकाे धन्दा उच्च दरमा फैलिँदाे छ। यस विषयमा नेपाल राष्ट्र बैंककाे काराेबार बन्द गरिदिने चेतावनीपछि पनि सट्टाबाजी घट्नुकाे सट्टा उल्टै बढेर जान थालेकाे हाे।
यहीबीच विश्वकप फुटबलमा सट्टाबाजी गराएको आरोपमा अर्का एक एजेन्ट पनि पक्राउ परेका छन्।
बेटिङ एप वान एक्स बेट लगायत एपमार्फत् सट्टाबाजी गराएको आरोपमा एक जनालाई प्रहरीले पक्राउ गरेको काठमाडौं उपत्यका अपराध अनुसन्धान कार्यालयका एसपी कृष्णप्रसाद कोइरालाले जानकारी दिए।
कार्यालयबाट खटिएको टोलीले बुधबार काठमाडौं महानगरपालिका–२८ कमलपोखरीबाट पक्राउ गरेको हो।
पक्राउ पर्नेमा काठमाडौं–२ टोखा चण्डेश्वरी बस्ने २६ वर्षीय सुजन गौली छन् ।
उनीमाथि मुलुकी अपराध संहिताको दफा १२५ को उपदफा ४ बमोजिम सट्टाबाजी गर्न गराउन नहुने कसुर अन्तर्गत अनुसन्धान अघि बढाएको छ। उनीमाथि थप अनुसन्धान गर्न कार्यालयले उनलाई जिल्ला प्रहरी परिसर काठमाडौंमा पठाएको छ।
एसपी कोइरालाका अनुसार गौली वान एक्स बेटमा सट्टाबाजी गराउने एजेन्ट हुन्।
उनले रकम संकलन र भुक्तानी गरेको आधारमा २५ प्रतिशत कमिसन समेत पाउँथे। जसले गर्दा उनले धेरैभन्दा धेरै जनालाई सट्टाबाजीमा संलग्न गराउने प्रहरीले बताएको छ।
प्रहरीले प्रारम्भिक अनुसन्धानको लागि ईसेवा, आईएमई पे, खल्तीबाट मात्रै दुई करोड ३६ लाख ३३ हजार १३८ रुपैयाँ बराबरको कारोबार गरेको देखिएको छ।
यस्तै २६ वटा अन्य डिजिटल वालेट तथा बैंकिङ प्रणालीमार्फत् ७ करोड ७२ लाख ८९ हजार ४६ रुपैयाँको कारोबार देखिएको एसपी कोइरालाले बताए।
योसँगै उनको विभिन्न खाताहरूबाट मात्रै १० करोड ९ लाख २२ हजार १८४ रुपैयाँको कारोबार भएको देखिएको छ।
गत मंगलबारमात्रै प्रहरीले ललितपुरको सानेपाबाट एक एजेन्टलाई पक्राउ गरेको थियो।
प्रतिक्रिया