भारतीय प्रधानमन्त्री मोदी र जर्मन चान्सलर शाेल्जबीच भेटवार्ता

जर्मनीका चान्सलर ओलाफ शाेल्जले भारतीय प्रधानमन्त्री नरेन्द्र मोदीसँग भेटवार्ता गरेका छन्। भारतको दुई दिने राजकीय भ्रमणका लागि शनिबार नयाँ दिल्ली पुगेका चान्सलर शाेल्जले प्रधानमन्त्री मोदीसँग भेटवार्ता गरेका हुन्। उनीहरूबीच केहीबेरमा पत्रकार सम्मेलन आयोजना गरिँदैछ।

उनी फेब्रुअरी २६ मा बेंगलुरु जानेछन्। सन् २०११ मा द्विवार्षिक अन्तरसरकारी परामर्श संयन्त्र सुरु भएदेखि जर्मन चान्सलरको भारतको यो पहिलो भ्रमण हो। २५ र २६ फेब्रुअरीमा राजकीय भ्रमणमा रहने चान्सलर शाेल्जका साथमा वरिष्ठ अधिकारीहरू र उच्चपदस्थ व्यक्तिहरूका साथै व्यापारिक प्रतिनिधिमण्डल पनि रहको छ।

प्रधानमन्त्री मोदी र चान्सलर शाेल्जबीच द्विपक्षीय, क्षेत्रीय र विश्वस्तरीय महत्त्वका विभिन्न विषयमा छलफल हुने भारतको विदेश मन्त्रालयले जनाएको छ। भारत-जर्मनी रणनीतिक साझेदारी साझा मूल्यमान्यता, विश्वास र पारस्परिक समझदारीमा आधारित छ। सुदृढ लगानी र व्यापारिक सम्बन्ध, हरित र दिगो विकासमा सहयोग र बढ्दो जनस्तरीय सम्बन्धले द्विपक्षीय सम्बन्धलाई थप सुदृढ बनाएको दुवै पक्षको बुझाइ छ ।

चान्सलर शाेल्जको भ्रमणले दुवै पक्षलाई छैठौं आईजीसीको मुख्य नतिजाहरूको विकसित विषयबारे भएको प्रगति, सुरक्षा र रक्षा सहयोगलाई सुदृढ गर्ने, दुवै पक्षका लागि आर्थिक सम्बन्धका लागि काम गर्ने, अवसर बढाउने लगायतका विषषमा छलफल गर्न मद्दत पुग्ने विश्वास गरिएको छ।

चान्सलर शाेल्जले राष्ट्रपति द्रौपदी मूर्मुलाई पनि भेट्ने कार्यक्रम छ। उनलाई राष्ट्रपति भवनको प्रांगणमा औपचारिक स्वागत गर्ने कार्यक्रम तय भएको छ।

प्रधानमन्त्री मोदीसँगको भेटअघि उनले भारतसँगको आफ्नो राष्ट्रको सम्बन्धलाई अझ प्रगाढ बनाउन चाहेको बताएका थिए। ‘भारत र जर्मनीबीच धेरै राम्रो सम्बन्ध छ र उनीहरू यसलाई अझ प्रगाढ बनाउन चाहन्छन्। यो हाम्रो वार्ताको विषय हुनेछ र महत्त्वपूर्ण कुरा विश्वमा शान्ति,’ स्कोल्जले ट्विटरमा लेखेका छन्।

चौथो पटक मोदीलाई भेटेका शाेल्ज रुस-युक्रेन युद्धको एक वर्ष पुगेको एक दिनपछि रुसको आक्रमणको विरोधमा समर्थन खोज्ने पश्चिमी शक्तिहरूका लागि दिल्लीको बढ्दो महत्त्वलाई प्रकाश पार्दै भारत पुगेका हुन्। रुस-युक्रेन युद्धमा संयुक्त राष्ट्र संघको महासभामा बिहीबार भएको शान्ति प्रस्तावमाथिको मतदानमा भारत तटस्थ बसेको छ। उसले कूटनीतिक वार्तामातर्फत समस्या समाधान गरिनुपर्नेमा जोड दिएको छ।

शाेल्जले आफ्नो भ्रमणमा भारतलाई छवटा परम्परागत पनडुब्बीहरू बेच्नका लागि ५.२ बिलियन अमेरिकी डलर सम्झौताको जोडदारसाथ कुरा उठाउने अन्तर्राष्ट्रिय समाचार संस्था रोयटर्सले जनाएको छ। यद्यपि पश्चिमी सैन्य उत्पादन शक्तिले नयाँ दिल्लीलाई सैन्य हार्डवेयरको लागि रुसमाथिको निर्भरताबाट छुटकारा दिने यो पछिल्लो प्रयासले तत्काल परिणाम ल्याउने अपेक्षा गरिएको छैन।

जर्मन मेशिन उपकरणको मुख्य क्रेता चीन र यसको प्रमुख उर्जा आपूर्तिकर्ता रुसले विगत १५ वर्षमा जर्मनीको समृद्धिमा खेलेको चीनसँगको घनिष्ट आर्थिक सम्बन्धलाई ध्यानमा राख्दै भारतको लागि जर्मनीको भूमिका विशेष गरी स्पष्ट छ।