पूर्वगृहमन्त्री बालकृष्ण खाणलाई जाेगाउन खाेज्ने ‘दूत’ बिरुद्ध पनि पक्राउ पूर्जी जारी
३१ वैशाख २०८० ११:०६
प्रहरीले नक्कली भुटानी शरणार्थी बनाएर अमेरिका पठाउने गिरोहका सदस्यहरु पक्राउ गरेपछि उनीहरुसँग थुनुवा कक्षमा गएर भेटघाटगर्ने तथा अनुचित प्रलोभन दिने आङटावा शेर्पाविरुद्ध पक्राउ पूर्जी जारी गरेको छ ।
शेर्पा हाल सम्पर्क विहिन छन् । प्रहरीले उनको खोजी गरिरहेको छ । प्रहरीले शनिवार काठमाडौँको मैजुबहालस्थित शेर्पाको घरमा छापा मारेर खानतलासी समेत गरेको छ ।
काठमाडौं जिल्ला अदालतले शरणार्थी प्रकरणमा नेपाली कांग्रेसका पूर्वसांसद शेर्पाविरुद्ध पक्राउ पुर्जी जारी गरेको हो । प्रहरी अनुसन्धानका हाल प्रहरीको हिरासतमा रहेका पूर्व गृहमन्त्री तथा नेपाली कांग्रेसका नेता बालकृष्ण खाणको दूत बनेर शेर्पा हिरासतमा रहेका अन्य थुनुवाहरुलाई भेटन गएका थिए । भेटमा उनले खाणको नाम नलिन दबाब र प्रलोभन दिएको हिरासतमा रहेकाहरुको बयानमा खुलेको थियो ।
थुनामा रहेका केशव दुलाल र सानु भण्डारीसँग आङटावाले हिरासतमा पुगेर भेट गरेका थिए । दुलाल र भण्डारी २०७९ चैत १२ देखी हिरासतमा छन् । आङटावाले मोरङ घर भएका दुलाललाई प्रहरी वृत्त कालीमाटी र ललितपुर घर भएका सानु भण्डारीलाई प्रहरी वृत्त जनसेवाको हिरासतमा पुगेर भेटेका हुन् ।
उनले भेटमा कांग्रेसका केन्द्रीय सदस्य एवं पूर्व गृहमन्त्री बालकृष्ण खाँणले आरोपीहरूसँग लिएको रकम फिर्ता गर्ने आश्वासन दिएको बयानमा खुलेको हो ।
२०७० मा रामेछाप–१ बाट संविधान सभा सदस्यमा निर्वाचित शेर्पा कांग्रेसको महाधिवेशन प्रतिनिधि हुन् ।
खाणलाई प्रहरीले वैशाख २७ मा पक्राउ गरेको थियो । सचिव टेकनारायण पाण्डे पनि थुनामा छन् । खाणका स्वकिय सचिव नरेन्द्र केसी पनि सो प्रकरणमा थुनामा छन् । केसीलाई प्रहरी वृत लैनचौरको हिरासतमा राखिएको छ ।
सम्बन्धित समाचार
प्रतिक्रिया