कैलालीमा सवारी दुर्घटनामा बिते नेपाल प्रहरीका एक जवान
अर्का एक प्रहरी जवान गम्भीर घाइते
१५ साउन २०८० १३:१०
कैलालीमा सवारी दुर्घटनामा परी नेपाल प्रहरीका एक जवानको मृत्यु भएको छ। अर्का एक जवान गम्भीर घाइते भएका छन्।
आइतबार साँझ पूर्वपश्चिम राजमार्गअन्तर्गत गोदावरी नगरपालिका-३ को चौकीडाँडामा प्रहरी जवानद्वय सवार सुपप्र ०१०११ प ७३२० नम्बरको मोटरसाइकललाई सुपप्र ०१ ००२ त ६४१९ नम्बरको ट्र्याक्टरले ठक्कर दिएको थियो।
ट्र्याक्टरको ठक्करबाट घाइते नेपाल प्रहरी विशेष सुरक्षा गण महेन्द्रनगरमा कार्यरत प्रहरी जवान कपिल कठायतको सेती प्रादेशिक अस्पतालमा उपचारका क्रममा आइतबार राति साढे ९ बजे मृत्यु भएको जिल्ला प्रहरी कार्यालय कैलालीले जनाएको छ।
यस्तै मोटरसाइकल पछाडि सवार अर्का प्रहरी जवान हेमराज डाउका गम्भीर घाइते छन्। डाउका अस्थायी प्रहरी पोष्ट राजपुर डोटीमा कार्यरत हुन्। उनी ४ दिन क्याबी भैपरी आउने बिदामा बसेका थिए।
डाउकाको मायामेट्रो अस्पताल धनगढीमा उपचार भइरहेको छ।
घटनापछि ट्र्याक्टर र चालकलाई प्रहरीले नियन्त्रणमा लिएर अनुसन्धान अघि बढाएको छ।
सम्बन्धित समाचार
प्रतिक्रिया