जापानमा दुईवटा विमान ठोक्किँदा पाँच जनाको मृत्यु भएको पुष्टि

जापानका यातायातमन्त्रीले मंगलबार टोकियोको हानेदा विमानस्थलमा जापान एयरलाइन्सको विमान धावनमार्गमा तट रक्षकको विमानसँग ठोक्किँदा तट रक्षकको विमानमा सवार पाँच जनाको मृत्यु भएको बताएका छन् ।

‘तट रक्षकको विमानका बारेमा कप्तान भागेको र पाँच जनाको मृत्यु भएको पुष्टि भएको हामीलाई जानकारी गराइएको छ,’ मन्त्री तेत्सुओ साइतोले पत्रकारहरूसँग भने।

जापान एयरलाइन्सको विमान धावनमार्गमा तट रक्षकको विमानसँग ठोक्किएपछि आगलागी भएको मिडिया रिपोर्टले जनाएको छ। प्रसारक एनएचकेले सार्वजनिक गरेका तस्बिरहरूमा विमानको तल पछाडि आगोको मुस्लो देखिनुअघि विमान धावनमार्गमा अगाडि बढिरहेको देखाइएको छ ।

एनएचकेका अनुसार एयरबस विमानमा सवार सबै तीन सय ६७ यात्री र चालक दलका १२ सदस्यलाई सुरक्षित निकालिएको छ । क्योदो समाचार एजेन्सीका अनुसार विमानमा आठ बालबालिका पनि थिए ।

यसअघि तट रक्षक विमानमा चालक दलका छ सदस्यमा एक जना सुरक्षित रहेको र अन्य पाँच जनाको अवस्था थाहा नभएको एनएचकेले बताएको थियो । घटनाको कारण तत्काल स्पष्ट नभए पनि टेलिभिजन रिपोर्टअनुसार एयरबस तट रक्षक विमानसँग ठोक्किएको थियो ।

जीजी समाचार समितिका अनुसार सोमबार मध्य जापानमा गएको महाभूकम्पपछि उद्धार प्रयासमा सहयोगका लागि तट रक्षक विमान प्रस्थान गर्न लागेको थियो । तट रक्षक विमान भर्खरै मात्र उत्तरी जापानी टापु होक्काइदोको साप्पोरा विमानस्थलबाट आएको थियो ।