शालिन मृत्यु प्रकरणमा यस्तो छ चितवन प्रहरीको प्रारम्भिक अनुसन्धान प्रतिवेदन

प्रहरीले शालिन पोखरेल मृत्यु प्रकरणको प्रारम्भिक अनुसन्धान प्रतिवेदन आधिकारीक बाहिर ल्याएको छ । जिल्ला प्रहरी कार्यालय चितवनका प्रवक्ता नायव उपरीक्षक (डीएसपी) श्रीराम भण्डारीले शालिनको पोष्टमार्टम रिपोर्टप्राप्त भएको र अन्य रिपोर्टहरु आएपछि तथ जानकारी सार्वजनिकगर्ने बताएका छन् ।

उनका अनुसार चितवनको रत्ननगर नगरपालिका–१० स्थित शिशु निकेतन माविको छात्रावासमा मृत फेला परेकी १४ वर्षीया शालिन पोखरेलको मृत्यु ‘झुण्डिएको कारण’ भएको पोष्टमार्टम रिपोर्टले देखाएको छ ।

त्रिवि शिक्षण अस्पताल, महाराजगञ्जमा गरिएको पोष्टमार्टम जाँचपछि तयार पारिएको प्रतिवेदनमा झुण्डिएका कारण मृत्यु भएको उल्लेख रहेको जाँच डीएसपी भण्डारीले बताए । बालिकाका आफन्तले उनको बलात्कार भएको हुनसक्ने आशंका गरे पनि पोष्टमार्टममा संलग्न चिकित्सकका अनुसार पोस्टमार्टममा भने बलात्कार भएको संकेत देखिएको छैन ।

जिल्ला प्रहरी कार्यालय चितवनका प्रवक्ता तथा डीएसपी श्रीराम भण्डारीले पोस्टमार्टमसँगै भिसेरा र अन्य अनुसन्धान प्रतिवेदन आउनेक्रममा रहेको बताएका छन् ।

कक्षा ८ मा अध्ययनरत पोखरेल यही फागुन १२ मा स्कुलले सञ्चालन गरेको होस्टेलमा मृत फेला परेकी थिइन् । उनी झुन्डिएको अवस्थामा भेटिएको प्रहरीले जनाएको छ । शालिन पछिल्लो समय रत्ननगर–१५ स्थित माधवपुरमा रहेको मामाघरमा बस्थिन् । गोरखा अजिरकोट गाउँपालिका–५ मुच्चोकका दिपेन्द्र पोखरेलले आफ्नी छोरी शालिनको बलात्कारपछि हत्या भएको दाबी गरेका छन् ।

आफन्तको जाहेरीपछि प्रहरीले विद्यालयका प्रिन्सिपल बालहरि देवकोटा, भाइस प्रिन्सिपल किरणबहादुर अधिकारी र होस्टेल वार्डेन कमल शर्मा पौडेललाई नियन्त्रणमा लिई अनुसन्धान गरिरहेको छ ।

यस्तै, प्रधानमन्त्री पुष्पकमल दाहालले घटनाप्रति दुःख व्यक्त गम्भीर छानबिन गर्न प्रहरीलाई निर्देशन दिएको भन्दै शनिबार स्ट्याटस लेखेका छन् । एमाले अध्यक्ष केपी शर्मा ओली, कांग्रेस लगायतले विज्ञप्ति जारी गर्दै घटनाको निष्पक्ष अनुसन्धान गर्न माग गरेका छन् ।

नेताहरुको चासो र सामाजिक सञ्जालमा घटनाबारे विभिन्न कोणबाट चर्चा हुन थालेपछि चितवन प्रहरीले शनिबार एक विज्ञप्ति जारी गर्दै अनुसन्धान भइरहेको र घटनाबारे अनावश्यक विषयवस्तु सम्प्रेषण नगर्न अनुरोध गरेको थियो ।