सेना दिवसमा भारतीय सेनाध्यक्ष जनरल पाण्डे नेपाल आउँदै

भारतीय स्थल सेनाध्यक्ष जनरल मनोज पाण्डे नेपाल आउने भएका छन्। सेना दिवस-२०७९ मा सहभागिताका लागि नेपाली सेनाले उनलाई निमन्त्रणा पठाएको हो।

नेपाली सेनाले प्रत्येक वर्ष महाशिवरात्रिको दिनलाई सेना दिवसका रूपमा मनाउँदै आएको छ। यस वर्ष फागुन ६ गते महाशिवरात्रि एवं सेना दिवस मनाइँदै छ।

सैनिक प्रवक्ता सहायकरथी कृष्णप्रसाद भण्डारीका अनुसार सेना दिवसमा सहभागिताका लागि सेनाध्यक्ष जनरल पाण्डेसहित नेपाली सेनाको मानार्थ महारथी पदवी पाएका सबैलाई निमन्त्रणा पठाइएको छ। यद्यपि उनीहरू नेपाल आउने/नआउनेबारे औपचारिक टुंगो भने लागिसकेको छैन।

‘नेपाली सेनाको मानार्थ महारथी पदवी पाएका सबैलाई निम्तो पठाएका छौं। आउनुहुन्छ/आउनुहुन्न भन्ने टुंगो लागिसकेको छैन,’ प्रवक्ता भण्डारीले भने।

जनरल पाण्डे यसपटक नेपाल आए उनको यो दोस्रो नेपाल भ्रमण हुनेछ। यसअघि उनी गत भदौ १९ गते ५ दिने नेपाल भ्रमणमा आएका थिए। उनले त्यसबेला नेपाली सेनाकाे मानार्थ महारथीको पदवी लिएका थिए।

नेपाल र भारतका सेना प्रमुखहरू एकअर्को देशको मानार्थ महारथी हुने परम्परा रहिआएको छ।