मालीमा बम विस्फोट : ३ शान्ति सैनिकको मृत्यु, ५ गम्भीर, नेपाली सैनिक सुरक्षित

अफ्रिकन मुलुक मालीमा विस्फोटनमा परी संयुक्त राष्ट्रसंघको शान्ति सैनिक मिसन (मिनुस्मा)मा कार्यरत सेनेगलका तीन जना शान्ति सैनिकको मृत्यु भएको छ । केन्द्र मालीमा मंगलबार भएको उक्त विस्फोटनमा परी अन्य पाँच जना सैनिक गम्भीर घाइते भएको मिनुस्माले जनाएको छ ।

मिसनमा कार्यरत सबै नेपाली शान्ति सैनिक भने सुरक्षित रहेको नेपाली सेनाका प्रवक्ता सहायरथी कृष्णप्रसाद भण्डारीले जानकारी दिए । नेपाली सैनिक रहेको क्षेत्रको अवस्था सामान्य रहेको उनले बताए । मालीको शान्ति मिसनमा नेपालका ‘स्टाफ’, ‘अब्जर्भर’ ‘कन्टिजेन्ट’ समेत गरी एक सय ८१ सकलदर्जा कार्यरत छन् ।