सांसदहरूले बोलेको सरकारले नसुनेको भन्दै संसदमा हरि ढकालले गरे मौनधारण

राष्ट्रिय स्वतन्त्र पार्टीका सांसद हरि ढकालले प्रतिनिधि सभाको शून्य समयमा मौनधारण गरेका छन्। सांसदहरूले संसदमा उठाएका विषय सरकारले नसुनेको भन्दै त्यसको विरोधमा उनले सो समय मौनधारण गरेर गरेर बिताएका हुन्।

उनले भने, ‘सम्माननीय सभामुख महोदय, यो सरकारले हामी माननीयले बोलेको केही पनि नसुनेको भएर मैले यो शून्य समयमा मौनधारण गरेँ। धन्यवाद।’

प्रतिनिधि सभा नियमावलीअनुसार शून्य समयमा एक मिनेटको समय तोकिएको हुन्छ। सोही समयमा बोल्न उभिएका सांसद ढकालले ‘सम्माननीय सभामुख महोदय…,’ भनेर मौन बसेका हुन्। र, पछि ‘यो सरकारले हामी माननीयले बोलेको केही पनि नसुनेको भएर मैले यो शून्य समयमा मौनधारण गरेँ’ भनेर आफ्नो भनाइ अन्त्य गरे।