आठौं राष्ट्रिय लोकदोहोरी अवार्ड असोज ११ गते काठमाडौंमा, २४ विधामा अवार्ड

राष्ट्रिय लोक तथा दोहोरी गीत प्रतिष्ठान उपत्यका समन्वय समितिले आठौं राष्ट्रिय लोकदोहोरी अवार्ड-२०८० को आयोजना गरेको छ। आज (सोमबार) रिपोर्टर्स क्लब नेपालमा पत्रकार सम्मेलन गरी उपत्यका समन्वय समितिले कार्यक्रम आयोजनाबारे जानकारी गराएको हो।

कार्यक्रम आगामी असोज ११ गते राष्ट्रिय नाचघर जमलमा हुनेछ। उक्त अवार्ड २४ वटा विधामा वितरण गरिने बताइएको छ। साथै दीर्घसाधना सम्मानलगायत आठ अन्य विभिन्न विधामा पनि सम्मान प्रदान गरिने बताइएको छ।

राष्ट्रिय लोक तथा दोहोरी गीत प्रतिष्ठान उपत्यका समन्वय समितिका अध्यक्ष अर्जुन थापामगरले अवार्ड समग्र दोहोरी क्षेत्रसँग सम्बन्धित व्यक्तित्वहरूलाई प्रदान गरिने बताए।

उपत्यका समन्वय समितिले विभिन्न आठवटा विधामा सम्मानित हुने व्यक्तित्वहरूको नामसमेत सार्वजनिक गरेको छ। समन्वय समितिले नगद राशीसहित लाईफ टाइम एचिभमेन्ट सम्मान कृष्णसुधा ढुंगानालाई नगद राशिसहित प्रदान गर्ने बताएको छ।

त्यसैगरी संस्थागत श्रष्टा सम्मानबाट राष्ट्रिय लोक तथा दोहोरी गीत प्रतिष्ठानका पूर्वअध्यक्ष पुरूषोत्तम न्यौपानलेलाई प्रदान गरिने बताइएको छ। लोकगीतको क्षेत्रमा दश वर्षसम्मकोे योगदान र सफलतालाई सम्मान गर्दै एकनारायण भण्डारीलाई दशक श्रष्टा सम्मान प्रदान गरिने अध्यक्ष थापामगरले बताए।

लोक संगीतलाई माथि उठाउनका लागि योगदान दिएका राजकुमार रायमाझीलाई लोक पत्रकारिता सम्मान प्रदान गरिने भएको छ। सदावहार लोकगीतमा ‘बाबरी फूलको बोट’ गीतलाई सम्मान प्रदान गरिने अध्यक्ष थापामागरले बताए।

त्यसैगरी लोकदोहोरी कलाकार साँझ सम्मान (नगद राशिसहित) कृष्ण आँसुलाई र लोकदोहोरी उपत्यका विशिष्ट सम्मान समाजसेवी सपना रोकालाई प्रदान गरिने बताइएको छ। लोकदोहोरी अवार्ड विशेष सम्मान शिव हमाललाई प्रदान गरिने बताइएको छ।

कार्यक्रममा राष्ट्रिय लोक तथा दोहोरी गीत प्रतिष्ठान केन्द्रीय कार्यसमितिका पूर्वअध्यक्ष एवं उपत्यका समन्वय समितिका प्रमुख संरक्षक दुर्गा रायमाझी, पूर्वअध्यक्ष वरिष्ठ गायक चन्द्र शर्मा, कोषाध्यक्ष अमृत अधिकारी, सदस्य एवं उपत्यका समन्वय समितिका निवर्तमान अध्यक्ष सुजन लम्साल, सहसचिव राजकुमार रायमाझी, वरिष्ठ अभिनेता सुदर्शन आयार्य, उपत्यका समन्वय समितिका संरक्षक सुवास खड्का, लोक सञ्चारकर्मी नेपालका उपाध्यक्ष चन्द्रमणि गौतमलगायतको सहभागिता रहेको थियो।