‘काठमाडौं र धरानमा उदाएका युवाहरूको आवाजलाई सिंगो राष्ट्रले बुलन्द गरिरहेको छ’

सभामुख अग्निप्रसाद सापकोटाले काठमाडौं र धरानमा उदाएका युवाहरूको आवाजलाई सिंगो राष्ट्रले बुलन्द गरिरहेको बताएका छन् ।

सोमबार काठमाडौंमा आयोजित राष्ट्रमा जीपीएस समृद्ध अभियानको शुभारम्भ गर्दै सभामुख सापकोटाले काठमाडौंका मेयर बालेन साह र धरानका मेयर हर्क साम्पाङलाई संकेत गर्दै यस्तो बताएका हुन् ।

उनले अहिले राष्ट्रमा काठमाडौं र धरानलगायतका स्थानमा युवाहरूको आवाजरूपी संकेतको रूप देखा परेको बताए । सभामुख सापकोटाले युवाहरूको आवाज बुलन्द गर्ने छिटपुट संकेत देखा परे पनि साइरनरूपी यी संकेतको भाषा बुझ्न आवश्यक रहेको बताए ।

उनले पर्याप्त फलफुल, तरकारी, खाद्यान्न उत्पादन गर्ने नेपालजस्तो उर्वर भूमिमा २ खर्ब ५० करोडको खाद्यवस्तु आयात हुनु दुःखद् भएको बताए । सभामुख सापकोटाले खरानीसमेत नेपालमा आयात हुन्छ भन्ने सुन्दा अचम्मित भएको बताए ।

सभामुख सापकोटाले विश्वभर अराजकता र एक प्रकारको अन्तरविरोध मडारिन थालेको बताए । उनले संसारको ध्यान व्यापार, हतियारको होडबाजी रसैन्य क्षेत्रमा नै केन्द्रित भइरहेको उल्लेख गरे । उनले नेपालमा पनि राष्ट्रिय दृष्टिकोण निर्माण गर्नुपर्ने आवश्यक्ता रहेको बताए ।

सभामुख सापकोटाले जलवायु परिवर्तनका असर र प्रभावहरू एकपछि अर्को गरेर गम्भीर रूपमा देखा परिरहेको उल्लेख गर्दै यसलाई समाधान गर्ने दिशमा अघि बढ्न आवश्यक रहेकोमा जोड दिए । उनले जलवायु परिवर्तनका अकल्पनीय घटना भइरहेको बताए ।

सभामुख सापकोटाले जलवायु परिवर्तनको शिक्षालाई राम्रोसँग अध्ययन गर्न नसके र यसका असर, प्रभावका बारेमा विश्लेषण गर्ने र बच्नेतिर ध्यान दिन नसके ठूलो दुर्घटना हुने बताए । उनले नेपालले अहिले हरित क्रन्तितिर नै ध्यान दिनुपर्ने आवश्यक्ता रहेको भन्दै पर्यावरण र वातावरण संरक्षणमा ध्यान दिन अति जरुरी भएको बताए ।

प्रतिक्रिया

Leave a Reply

Your email address will not be published.

ताजा खबर