![Pardafas.com](https://www.pardafas.com/wp-content/uploads/2022/06/pardafas-logo.png)
कांग्रेस नेता पौडेलको निर्देशन, ‘प्रतिगमनलाई परास्त गर्ने संकल्प लिएर चुनावमा लाग्नुस्’
![clock](https://www.pardafas.com/wp-content/themes/pardafas/assets/img/clock-icon.png)
![कांग्रेस नेता पौडेलको निर्देशन, ‘प्रतिगमनलाई परास्त गर्ने संकल्प लिएर चुनावमा लाग्नुस्’](https://www.pardafas.com/wp-content/uploads/2022/10/Ramchandra-Paudel.jpg)
नेपाली कांग्रेसका वरिष्ठ नेता रामचन्द्र पौडेलले प्रतिगमनलाई परास्त गर्छौं भन्ने संकल्प लिएर चुनावमा लाग्न गठबन्धनका नेता तथा कार्यकर्ताहरूलाई निर्देशन दिएका छन् । शुक्रबार गठबन्धनको तर्फबाट पोखरामा आयोजित प्रदेशस्तरीय भेलालाई सम्बोधन गर्दै उनले सो निर्देशन दिएका हुन् ।
वरिष्ठ नेता पौडेलले राष्ट्रमाथि संविधानको रक्षा गर्ने ठूलो चुनौती आएको भन्दै चुनौतीको सामना गर्न गठबन्धन एक हुनु आवश्यक भएको बताए । उनले आफ्ना पार्टीका सिद्धान्त, झण्डा र अडानलाई छोडेर प्रतिगमनलाई परास्त गर्नका लागि र गठबन्धनलाई जिताउनका लागि निर्वाचन प्रचारप्रसारमा लाग्न पनि निर्देशन दिए ।
उनले कसरी गठबन्धनका उम्मेदवारलाई जिताउने भन्ने सोचेर एकता र समझदारी बनाउन आवश्यक भएको बताए । वरिष्ठ नेता पौडेलले गठबन्धनले जितेको खण्डमा देशलाई सुशासन दिने, युवाहरूलाई स्वरोजगार बनाउने र विदेशमा गई भौँतारिनुपर्ने बाध्यताबाट मुक्त गर्ने प्रतिबद्धता व्यक्त गरे । उनले गठबन्धनले जित्ने कुरा ठूलो नभई प्रतिगमनलाई रोक्ने कुरा नै ठूलो भएको जिकिर गरे ।
वरिष्ठ नेता पौडेलले सबै गठबन्धनका दल र नेता, कार्यकर्ताहरूले अतीतलाई बिर्सिएर भविष्यलाई उज्यालो बनाउन सहयोग गर्नुपर्ने बताए ।
प्रतिक्रिया