फिल्म ‘तिम्रो मेरो साथ’मा आफ्नो अभिनयलाई लिएर उत्साहित छु : सन्दीप क्षेत्री

चलचित्र ‘तिम्रो मेरो साथ’को ट्रेलर सार्वजनिक भएको छ । मंगलबार काठमाडौंमा एक कार्यक्रमबीच ट्रेलर सार्वजनिक भएको हो ।

ट्रेलर चलचित्रका मुख्य कलाकारहरू अभिनेत्री साम्राज्ञी राज्यलक्ष्मी शाह र अभिनेता पुष्प खड्काको वरिपरि घुमेको छ । ट्रेलरमा उनीहरूबीचको प्रेम, रोमान्स, बदलालाई दर्शाइएको छ ।

चलचित्रको ट्रेलरमा कलाकार सन्दीप क्षेत्री, एमिली लामा, सरोज खनाललगायतलाई समेटिएको छ । पुष्पको एमिलीसँगको प्रेमकथालाई ट्रेलरमा देखाइएको छ । प्रेमकथामा निर्माण गरिएको ‘तिम्रो मेरो साथ’लाई रमेश एमके पौडेलले निर्माण एवं निर्देशन गरेका छन् ।

कार्यक्रममा बोल्दै अभिनेता पुष्प खड्काले फिल्ममा नयाँ किसिमको लभ स्टोरी रहेको बताए । उनले चलचित्रमा माया, साथ, सहयोग र विश्वासघातलाई देखाइएको बताए ।

त्यस्तै अभिनेता सन्दीप क्षेत्रीले फिल्मले अपेक्षित परिणाम ल्याउनेमा विश्वस्त रहेको बताए । उनले कुनै पनि निर्माताले पैसा टन्न भयो, व्यापार राम्रो चलिरहेको छ, अब अलिकति डुब्दिऔँ न त भनेर चलचित्र नबनाउने भन्दै सबैले राम्रोसँग साथ दिने बताए । उनले फिल्ममा आफ्नो अभिनयलाई लिएर एक्साइटेड रहेको बताए ।

पासाङ लामा, अर्णव पौडेल र आर्यन पौडेल निर्माता रहेको चलचित्रको कार्यकारी निर्माता र पटकथा लेखकको रूपमा सवीर श्रेष्ठ रहेका छन् । चलचित्रमा साम्राज्ञी राज्यलक्ष्मी शाह र पुष्प खड्का, सन्दीप क्षेत्री, एमिली लामा, सरोज खनाल, खडक बी पुन, दिपिशा केसीलगाायतका कलाकारहरूको अभिनय रहेको छ । एमिली लामाको भने यो डेब्यु चलचित्र हो । फिल्ममा शिव ढकालको छायांकन, सुवास भूषाल र योगेश काजीको संगीत, रामजी लामिछानेको कोरियोग्राफी र भूपेन्द्र अधिकारीको सम्पादन रहेको छ । चलचित्र पुस २९ देखि देशभर प्रदर्शन हुनेछ ।

हेर्नुहाेस् चलचित्र ‘तिम्राे मेराे साथ’काे ट्रेलर :