माघ २७ गतेको संघीय संसद्को संयुक्त बैठकलाई राष्ट्रपतिले सम्बोधन गर्ने
२२ माघ २०७९ १९:५७
माघ २७ गतेको संघीय संसद्को संयुक्त बैठकलाई राष्ट्रपति विद्यादेवी भण्डारीले सम्बोधन गर्ने भएकी छन्। आइतबार प्रतिनिधि सभाको बैठकमा सभामुख देवराज घिमिरेले सो विषयमा जानकारी गराएका हुन्।
उनले उक्त दिनको प्रतिनिधि सभाको बैठकमा संघीय संसद् दुवै सदनका सांसदहरूलाई २ः४५ बजे नै सभामा निर्धारित पोशाकमा उपस्थित हुन आग्रह गरे। उनले राष्ट्रपति भण्डारीले संयुक्त सभालाई ३ बजे सम्बोधन गर्ने बताए।
प्रतिनिधि सभाको आजको बैठकमा कानून, न्याय तथा संसदीय मामिलामन्त्रीको तर्फबाट खानेपानीमन्त्री अब्दुल खानले बेपत्ता पारिएका व्यक्तिको छानबिन आयोग र सत्य निरूपण तथा मेलमिलाप आयोगको कार्यावधि २०७९ असोज मसान्तसम्म रहेकोमा ती आयोगबाट सम्पादन हुनुपर्ने शान्ति प्रक्रियाका काम बाँकी रहेकाले वि.सं.२०८० साल असार मसान्तसम्म उक्त आयोगहरूको म्याद थप गर्ने गरी नेपाल सरकार मन्त्रीपरिषद्को असोज २८ गते बसेको निर्णयबाट जारी भएको बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन, २०७१ को दफा ४२ बमोजिमको बाधा अड्काउ फुकाउ आदेश सदनसमक्ष पेस गरे। प्रतिनिधि सभाको अर्को बैठक माघ २७ गते शुक्रबार दिनको ५ बजे बस्नेछ।
प्रतिक्रिया