‘ए’ डिभिजन लिग : फ्रेन्ड्सको पहिलो जित, चर्च ब्वाइज संकटासँग रोकियो

जावलाखेल युथ क्लबलाई पराजित गर्दै फ्रेन्ड्स क्लबले सहिद स्मारक ए डिभिजन लिग फुटबलमा पहिलो जित निकाल्दा नवप्रवेशी चर्च ब्वाईज र संकटाले गोलरहित बराबरी खेल्दै अंक बाँडेका छन् ।

त्रिपुरेश्वरस्थित दशरथ रंगशालामा मंगलबार सम्पन्न खेलमा फ्रेन्ड्स क्लबले जावलाखेल युथ क्लबलाई २–१ गोल अन्तरले पराजित गर्दै जारी लिगमा पहिलो जित निकालेको हो । फ्रेन्ड्सको जितमा राफिक एमिनु र प्रकाश बुढाथोकीले एकएक गोल गर्दा जावलाखेलका फोडे फोफानाले सान्तोवना गोल फर्काएका थिए ।

टोलीमा विदेशी खेलाडी भित्र्याएसँगै उच्च मनोबलका साथ खेलेको फ्रेन्ड्सले खेलको १९ औं मिनेटमा अग्रता निकालेको थियो । प्रतिष्पर्धात्मक बनेको खेलमा राफिक एमिनुले गोल गर्दै फ्रेन्ड्सलाई शुरुवाती अग्रता दिलाएका थिए । कप्तान प्रकाश बुढाथोकीले प्रहार शसक्त बल रोक्ने क्रममा जावलाखेलका गोलकिपर अनिश देउलाले पन्च गर्दै फालेको रिबाउण्ड बलमा राफिकले गोल गरेका हुन् । त्यसपछि दबाब दिएर खेलेको फ्रेन्ड्सले ४० औं मिनेटमा अग्रता दोब्बर बनायो । कप्तान प्रकाशले लक्ष्मण रुचालले उपलब्ध गराएको पासलाई सदुपयोग गर्दै फ्रेन्ड्सलाई २–० को अग्रता दिलाएका हुन् ।

पहिलो हाफमा लिएको अग्रतापछि दोस्रो हाफमा फ्रेन्ड्सले पहिलो हाफको लयलाई निरन्तरता दिन सकेन । पछि परेको जावलाखेल खेलमा फर्किन अनेकौं प्रसास गर्दा ८७ औं मिनेटमा अग्रता छोट्याएको थियो । जावलाखेलका फोडे फोफानाले पेनाल्टीमार्फत गोल अन्तर घटाएका थिए । फ्रेन्ड्सका अमित तामाङले जावलाखेलका समिराज थोकरलाई पेनाल्टी क्षेत्रमा लडाएपछि जवालाखेलले पेनाल्टीको अवसर पाएको थियो । इन्जुरी समयमा जवालाखेलका कप्तान सिमान्त थापा दोहोरो पहेँलोको कार्डको सामना गर्दै मैदान बाहिरिएपछि अन्तिम समयमा १० खेलाडीमा समेटिएको थियो । फ्रेन्ड्सका राफिकलाई कुहिनाले हान्दै लडाएपछि रेफ्री विश्वास कार्कीले उनलाई रातो कार्ड देखाएर मैदान बाहिर पठाएका थिए ।

यस जितसँगै पहिलो जित निकालेको फ्रेन्ड्सले ४ खेलमा ४ अंक जोडेको छ । जावलाखेलको यो पहिलो हार हो । जावलाखेलले ४ खेलमा ७ अंक जोडेको छ ।

लिग अन्तर्गत मंगलवार नै एन्फा मुख्यालयको मैदानमा सम्पन्न खेलमा शीर्ष स्थानको चर्च ब्वाइज युनाईटेड र संकटा क्लवले गोलरहित बराबरी खेल्दै अंक बाँडेका छन् । चर्च ब्वाईजमा अञ्जन बिष्टको आगमन भएको खेल निकै प्रतिष्पर्धात्मक बनेको थियो । दुवै टोलीले खेल अवधिभर पाएका केही राम्रा अवसरलाई सदुपयोग गर्न असफल भएका थिए । यससँगै यसै सिजन बढुवा भएको चर्च ब्वाइजले जारी लिगमा पहिलो बराबरी खेलेको छ । यसअघि चर्चले अघिल्लो तीन खेलमा सुखद् नतिजा निकाल्दै शीर्षता कायम राखेको थियो । चर्च ब्वाइज ४ खेलमा १० अंक जोडेर शीर्ष स्थानमा रहेको छ । संकटाले ४ खेलमा ५ अंक जोडेको छ ।

लिगमा बुधवार दुई खेल हुनेछन् । पहिलो खेल च्यासल मैदानमा विभागीयद्वय त्रिभुवन आर्मी फुटबल क्लव र एपिएफ क्लव तथा दोस्रो खेल दशरथ रंगशालामा न्युरोड टिम (एनआरटी) र मनाङ मस्र्याङ्दी फुटबल क्लबबीच खेल हुनेछ ।