‘ए’ डिभिजन लिग : मच्छिन्द्रले सातदोबाटोलाई हरायो
१७ जेठ २०८० १९:३८
सहिद स्मारक ‘ए’ डिभिजन लिग फुटबल प्रतियोगिता अन्तर्गत आज भएको खेलमा मच्छिन्द्र फुटबल क्लब विजयी भएको छ ।
सातदोबाटोस्थित अखिल नेपाल फुटबल सङ्घ (एन्फा) कम्प्लेक्समा भएको खेलमा मच्छिन्द्रले सातदोबाटो युथ क्लबलाई ३–१ गोल अन्तरले पराजित गरेको हो । मच्छिन्द्रको जितमा आफिज ओलावालेले ह्याट्रिक पूरा गरे ।
पराजित सातदोबाटोका जोर्डन पुन मगरले एक गोल फर्काए । खेलको १७ औँ मिनेटमा ओलावालेले गोल गर्दै मच्छिन्द्रलाई सुरुआती अग्रता दिलाए । पहिलो हाफको अतिरिक्त समयमा ओलावालेले व्यक्तिगत दोस्रो गोल गर्दै मच्छिन्द्रलाई २–० को अग्रता दिलाए ।
खेलको ५६ मिनेटमा ओलावालेले ह्याट्रिक पूरा गर्दै मछिन्द्रलाई ३–० अग्रता दिलाए । त्यसपछि खेलको ८४औँ मिनेटमा सातदोबाटोका जोर्डनले एक गोल गरे । यस जितसँगै मच्छिन्द्र २३ खेलमा ३९ अङ्क जोड्दै अङ्क तालिकाको दोस्रो स्थानमा उक्लेको छ । समान खेल खेलेको सातदोबाटो २९ अङ्क जोडेर छैटौँ स्थानमा रहेको छ ।
सम्बन्धित समाचार
प्रतिक्रिया