बागलुङमा एकै रात ६ घरमा चोरी

बागलुङमा एकै रात छ घरमा चोरी भएको छ । जिल्लाको बडिगाड गाउँपालिका-५, खौलार बजारमा छ घरमा घरबाट सुनसहित पाँच लाख रूपैयाँ बराबरको चोरी भएको हो । गाउँपालिकाको केन्द्र नजिक रहेको बजारका एकै रातमा आधा दर्जन घरमा चोरी हुँदा स्थानीय त्रसित भएका छन् ।

बजारको पाँच पसलबाट नगद र एक घरबाट सुनचाँदी भएको बडिगाड गाउँपालिकाकी अध्यक्ष गण्डकी थापा अधिकारीले जानकारी दिए । रातको २ देखि ३ बजेको समयमा स्थानीय अर्जुनप्रसाद खरेलको घरबाट साढे तीन तोला सुन, खौलार बजारको प्रज्वल दाना पसलबाट नगद ६० हजार, खरेल भाडा पसल तथा हार्डवयरबाट नगद १५ हजार रूपैयाँ, जलजला होटलबाट नगद १० हजार रूपैयाँ, मायालु होटलबाट पाँच हजार रूपैयाँ, कक्षपति स्टोर्सबाट चार हजार नगद चोरी भएको अध्यक्ष अधिकारीले बताए ।

सबै घरका ताल्चा फुटालेर चोर प्रवेश गरेको स्थानीयको भनाइ छ । चोरी भएका हरेक पसलमा घरको पछाडिबाट च्यानल गेटको ताल्चा फुटाएर चोरी भएको उनको भनाइ छ । चोरी भएको खरेल भाँडा पसल तथा हार्डवयरको सीसी क्यामेरामा एक अर्धबैंसे पुरूष अनुहारमा मुकुण्डो लगाएर झोला बोकेको र पीपीई लगाएर घरको पछाडिबाट छिरेर काउन्टरको घर्रासहित चोरी गरेको देखिन्छ ।

जिल्ला प्रहरी कार्यालय बागलुङका सूचना अधिकारी एवं प्रहरी नायब उपरीक्षक मदन केसीले सीसी क्यामेराद्वारा घटनाको सुक्ष्म अनुसन्धान गरिने बताए । चोरी भएको ठाउँमा प्रहरीलाई सिभिलमा खटाइने र सीसीटीभी फुटेज फेला परेको हुँदा त्यसलाई आधार बनाएर अनुसन्धान अगाडि बढाएको केसीको भनाइ छ ।