एनआरएनए कतारले मनायो २० औं वार्षिकोत्सव, अबको नेतृत्वमा मध्यपूर्वको दाबी

गैरआवासीय नेपाली संघ, राष्ट्रिय समन्वय परिषद एनआरएनए कतारले आफ्नो २० औं स्थापना दिवस शुक्रबार भव्यताका साथ कतारको ओसिस बिच क्लबमा सम्पन्न गरेको छ । नेपाली राजदूतावास कतारका राजदूत डा.नरेश विक्रम ढकालको प्रमुख आतिथ्यता, एनआरएनए आईसीसीका उपाध्यक्ष आरके शर्मा, नरेन्द्र भाट, युवा उपाध्यक्ष राज रेग्मी, महिला उपाध्यक्ष यस्मीन बेगम सैयद, सचिव प्रविन गुरुङ, सहकोषाध्यक्ष होमनाथ शर्मा, मध्यपूर्व संयोजक मनोजकुमार श्रेष्ठ, राजेन्द्र अर्यालको विशेष आतिथ्यता तथा संघका अध्यक्ष मोहम्मद मुक्तदा मुसलमानको सभापतित्वमा उक्त दिवस मनाइएको थियो । सन् २००३ डिसेम्बर ११ तारिकका दिन कतारमा विश्वमै दोस्रो एनसीसीको रूपमा एनआरएनए कतारको स्थापना भएको थियो ।

कतारमा चलेको फिफा विश्वकपका कारण डिसेम्बरको दोस्रो साता मनाइने स्थापना दिवस केही दिन पर सारेर शुक्रबार मनाइएको अध्यक्ष मुक्तदाले बताए । स्थापना दिवसको अवसर पारेर पहिलो पटक परिषद सदस्य, एनआरएनए कतारका संस्थापक, आईसीसीका पदाधिकारी एवं सदस्यहरू, स्थापनाकालदेखिका सम्पूर्ण अध्यक्षहरूलगायत प्रमुख सल्लाहकार, सल्लाहकार, पदाधिकारी एवं सदस्यहरूलाई दोसल्ला ओढाएर सम्मानपत्रले सम्मान गरिएको थियो ।

कार्यक्रममा कतारमा रहेका विभिन्न संघसस्थाका अध्यक्ष तथा प्रतिनिधिहरूले वार्षिकोत्सवका अवसरमा शुभकामना मन्तव्य राखेका थिए । त्यस्तै एनआरएनए आईसीसी पदाधिकारीहरु, मध्यपूर्वका आरसी, डीआरसीलगायतका विभिन्न तहका पदाधिकारी, आईसीसीका मानार्थ तथा पदाधिकारीहरूले पनि शुभकामना मन्तव्य राखेका थिए ।

वक्ताहरू सबैले एनआरएन कतारको २० औं वार्षिकोत्सवको अवसरमा शुभकामना व्यक्त गर्दै एनआरएन कतार अब वयस्क भएको हुँदा केन्द्रको नेतृत्व लिन अब मध्यपूर्वले कम्मर कसेर लाग्नुपर्ने बताए । मध्यपूर्वबाट आकांक्षी बन्ने मात्र नभई जित्न पनि सजिलै सकिने हुँदा मध्यपुर्व एकताको खाँचो रहेको औंल्याए । उनीहरुले २० वर्षको इतिहासमा यसपटक मध्यपूर्वले नेतृत्व पाउन सबै लाग्ने र सफल बनाउने वक्ताहरुले दाबी गरे । रेमिट्यान्सको ५५ प्रतिशत हिस्सा ओगटेको खाडी क्षेत्रले एनआरएनको नेतृत्व लिन चुक्न नहुने उक्त कार्यक्रमका वक्ताहरूको भनाइ रहेको थियो ।
कार्यक्रममा बोल्दै प्रमुख अतिथि राजदूत ढकालले समयसँगै एनआरएन हुर्किँदै गएको जनाउँदै एनआरएन कतारको २० औं वार्षिकोत्सवको अवसरमा शुभकामना व्यक्त गरे । एनआरएन तथा समाजमा दुई दशकभन्दा बढी समय खर्चिएका अग्रजप्रति लक्षित गर्दै ढकालले नेपालबाट राजादेखि राष्ट्रपतिसम्मको भ्रमण कतारसम्म भए पनि कतारका राजाको भ्रमण नेपालमा हुन र गराउन किन नसकिएको होला भनी प्रश्न गरेका थिए । उनले आफूले उक्त कोसिस गरिरहेको बताए ।

राजदूत ढकालले आफू कतार आएको साढे पाँच महिना मात्र भएको हुँदा आफूले नेपालमा कतारका अमिरको भ्रमण गराउन पहल गरिरहेको बताउँदै सबैबाट साथ र सहयोगको अपेक्षा गरेको बताए ।

पानसमा बत्ती बालेर केक काट्दै उद्घाटन गरिएको कार्यक्रममा संघका प्रथम उपाध्यक्ष जैवी चाम्लिङ राईले स्वागत मन्तव्य गरेका थिए ।

महासचिव पदम गिरिले सञ्चालन गरेको कार्यक्रमको समापन गर्दै अध्यक्ष मुक्तदाले हरियो पासपोर्ट र रातो पासपोर्टबीच कुनै खाडल नरहेको बताए । उनले मध्यपूर्वले चाहेमा आईसीसीको फुट पनि मिलाउन सक्ने दाबी गर्दै एकजुट हुन सबैमा आग्रह गरे ।

उनले सबैजना एक अर्कालाई पछार्नमै लागेको हुँदा नेतृत्वमा पुग्न नसकेको दाबी गरे । अध्यक्ष मुक्तदाले मनमा चिसो तिक्तता भए २० औं स्थापना दिवसबाट त्यागेर अगाडि बढ्न सके सफलता मिल्ने विश्वास व्यक्त गरे ।

उनले २० औं वार्षिकोत्सवको अवसरमा उपस्थित भएर शुभकामना व्यक्त गर्ने सबै अग्रजहरू र एनआरएनए नेतृत्वप्रति आभार व्यक्त गरे । अध्यक्ष मुक्तदाले एनआरएन भनेकै एकले अरुलाई सम्मान गर्ने संस्था रहेकाले यसपटक २० औं वार्षिकोत्सवको अवसरमा एनआरएनए एनसीसी कतारले स्थापनाकालदेखि आजसम्म एनआरएनए एनसीसी कतारमा रहेर काम गर्ने सबै पदाधिकारी,उपस्थित आईसीसी पदाधिकारी र यस अभियानमा सहयोग गर्ने सबैलाई सम्मान गरेको बताए ।

एनआरएनए एनसीसी कतारले आफ्नो २० औं वार्षिकोत्सवको अवसरमा एनआरएनए आईसीसी पदाधिकारीहरु उपाध्यक्ष आरके शर्मा, नरेन्द्र भाट, युवा उपाध्यक्ष राज रेग्मी, महिला उपाध्यक्ष यस्मीन वेगम सैयद, सचिव प्रविन गुरूङ, सहकोषाध्यक्ष होमनाथ शर्मा, मध्यपूर्व संयोजक मनोजकुमार श्रेष्ठ ‘गोर्खाली’, राजेन्द्र अर्याल, पूर्व उपाध्यक्ष देवकाजी डंगोल, सागर नेपाल, अभियन्ता राजु सैयद, शनिकुमार ओली, चानक पोखरेल, विमल सुवेदी, मोहम्मद अजिज अली, रामहरि गैरे, केबी हमाल, नरेश श्रेष्ठ, कुमार खड्का, क्रान्ति सिंह, डा.नितेश अर्याल, माया केसी, नेपाली व्यवसायी संघ कतारका अध्यक्ष महेन्द्र चम्लागार्इं, जनसवाल राष्ट्रिय दैनिकका सम्पादक रामजी बगालेलगायतलाई दोसल्ला ओढाएर प्रमाणपत्रसहित विशेष सम्मान गरेको थियो ।

सम्मानित व्यक्तित्वहरुले एनआरएनए एनसीसी कतारको उल्लेखनीय कार्यको खुलेर प्रंशसा गर्दै अध्यक्ष मुक्तदालगायत सबै कार्यसमितिलाई धन्यवाद व्यक्त गरे ।