अमर र अशक्त प्रहरीका एक जना सन्ततिलाई पूर्ण छात्रवृत्ति दिने योजना छ : आईजीपी सिंह

प्रहरी महानिरीक्षक (आईजीपी) धीरजप्रताप सिंहले नेपाल प्रहरी अस्पताल स्कुल अफ हेल्थ साइन्सेज शैक्षिक कार्यक्रम तथा ज्येष्ठ प्रहरी अतिथि गृह भवनको उद्घाटन गरेका छन्। बिहीबार नेपाल प्रहरी अस्पताल, महाराजगञ्जमा आयोजित एक समारोहबीच उनले भवन उद्घाटन गरेका हुन्। साथै उनले नवनिर्मित भवनको निरीक्षण र भवन परिसरमा वृक्षरोपण पनि गरे।

उक्त अवसरमा प्रहरी महानिरीक्षक सिंहले नेपाल प्रहरी अस्पताल स्कुल अफ हेल्थ साइन्सेज कार्यक्रममा आबद्ध रही व्यवस्थापन कार्यमा सहयोग पुर्‍याउने प्राविधिक प्रहरी उपरीक्षक रामेश्वर अधिकारी, प्राविधिक प्रहरी नायब उपरीक्षक निर्मला रायमाझी र प्रहरी नायब निरीक्षक पुलवराज गिरीलाई आईजीपी सिंहले पुरस्कार प्रदान गरे। साथै उनले पुस महिनाको उत्कृष्ट प्राविधिक प्रहरी नायव उपरीक्षक डा. अविनाशध्वज जोशी र प्रहरी सहायक निरीक्षक हरिहर थापालाई पनि पुरस्कार प्रदान गरे।

समारोहलाई सम्बोधन गर्दै प्रहरी महानिरीक्षक सिंहले सर्वसाधारण र नेपाल प्रहरीका बहालवाला तथा अवकाशप्राप्त प्रहरी कर्मचारीका सन्ततिहरूको वृत्ति विकास गरी विकसित र समृद्ध राष्ट्र निर्माणमा आवश्यक पर्ने दक्ष जनशक्ति उत्पादन गर्न नेपाल प्रहरी अस्पताल स्कुल अफ हेल्थ साइन्सेज शैक्षिक कार्यक्रम सार्थक हुने विश्वास व्यक्त गरे। प्राविधिक शिक्षा तथा व्यवसायिक तालिम परिषद्बाट प्रमाणपत्र तह नर्सिङ कार्यक्रम सञ्चालन गर्न सम्बन्धनप्राप्त यस शैक्षिक संस्थालाई समयसापेक्ष स्तरोन्नति गराउँदै चिकित्सा शास्त्र अध्ययन अध्यापन गराउने देशकै नमूना शिक्षण संस्थाको रूपमा विकास गर्दै लैजानुपर्ने उनले बताए।

चिकित्सा शिक्षा क्षेत्रमा विकास भएका नवीनतम् प्रविधिहरूको अवलम्बन गर्दै शिक्षण प्रणालीलाई प्रविधिमैत्री, समयसापेक्ष र प्रयोगात्मक बनाउँदै लैजानुपर्ने आवश्यकता रहेको चर्चा गर्दै प्रहरी महानिरीक्षक सिंहले आगामी शैक्षिक सत्रदेखि चिकित्सा अध्ययनका लागि अमर र अशक्त प्रहरीका सन्ततिहरूमध्ये जेहेन्दार १ जनालाई पूर्ण छात्रवृत्ति, जुनियर प्रहरी अधिकृत, प्रहरी हवल्दारदेखि प्रहरी जवानसम्म र प्रहरी कार्यालय सहयोगीका सन्ततिहरू १/१ जनालाई ५० प्रतिशत छात्रवृत्ति सुनिश्चित गरिने योजना रहेको बताए।

प्रहरी महानिरीक्षक सिंहले नेपाल प्रहरी कल्याण कोषको सहयोगमा नवनिर्मित ज्येष्ठ प्रहरी अतिथि गृहले उनीहरूको अपेक्षालाई सम्मान र सम्बोधन गर्दै नेपाल प्रहरी अस्पतालबाट दैनिक रूपमा सेवा सुविधा प्राप्त गर्ने कुल संख्यामध्ये करिब ४० प्रतिशत अवकाशप्राप्त प्रहरी कर्मचारीहरू लाभान्वित हुने गरेको तथ्यले समेत पूर्वप्रहरी कर्मचारीहरूको सेवामा नेपाल प्रहरी अस्पताल प्रतिबद्ध रहेको सन्देश दिएको उल्लेख गरे। नेपाल प्रहरीका कर्मचारीहरूमा यस अतिथि गृहले संगठनप्रति सकारात्मक दृष्टिकोण विकास गर्ने विश्वास उनले व्यक्त गरे।

बिरामी वा सेवाग्राहीको दर्जा हेरेर र पहुँचको आधारमा मात्र सेवा प्रवाह गरियो भने कुनै सार्थकता नहुने बताउँदै प्रहरी महानिरीक्षक सिंहले भने, ‘अस्पतालबाट प्रदान गरिने सेवाहरूमा स्वास्थ्य अवस्थाको आधारमा सम्पूर्ण प्रहरी कर्मचारी र सर्वसाधारणको उत्तिकै सरल र सहज पहुँच हुनुपर्छ।’

नेपाल प्रहरी अस्पताल स्कुल अफ हेल्थ साइन्सेज शैक्षिक कार्यक्रम तथा ज्येष्ठ प्रहरी अतिथि गृहको प्रभावकारी सञ्चालनका लागि आवश्यक कार्यविधि र मापदण्ड तयार गरी यसलाई थप व्यवस्थित र सुविधासम्पन्न बनाउन अस्पताल प्रशासनलाई उनले निर्देशनसमेत दिए।
सो अवसरमा नेपाल प्रहरी अस्पतालकी मेडिकल डाइरेक्टर प्राविधिक प्रहरी अतिरिक्त महानिरीक्षक डा. आशा सिंहले धन्यवाद ज्ञापन गर्दै नेपाल प्रहरी संगठन स्वास्थ्यसम्बन्धी शैक्षिक कार्यक्रमहरू सञ्चालन गरी राष्ट्रलाई आवश्यक दक्ष स्वास्थ्यकर्मीको उत्पादन गर्न विगतदेखि नै प्रयासरत रहेकोमा यस शैक्षिक सत्रबाट शैक्षिक कार्यक्रम सञ्चालनको लागि सम्बन्धन प्राप्त भई प्रमाणपत्र तह नर्सिङ कार्यक्रम सञ्चालन भएको बताइन्। देशमा शान्ति सुरक्षा कायम राख्न अहोरात्र खटिएका प्रहरी कर्मचारी तथा आफ्नो जीवनको ऊर्जावान् समय प्रहरी सेवामा दिई अवकाश भएका पूर्वप्रहरी कर्मचारीहरू र तिनका आश्रित परिवारहरूको स्वास्थ्य उपचारलाई गुणस्तरीय बनाउन नेपाल प्रहरी अस्पताल प्रतिबद्ध रहेको उनले उल्लेख गरिन्।

प्राविधिक प्रहरी नायब महानिरीक्षक डा. सञ्जयविक्रम श्रेष्ठले स्वागत मन्तव्य व्यक्त गरेको उक्त कार्यक्रममा प्राविधिक प्रहरी उपरीक्षक रामेश्वर अधिकारीले स्कुल अफ हेल्थ साइन्सेज शैक्षिक कार्यक्रमसम्बन्धी प्रतिवेदन र प्राविधिक प्रहरी निरीक्षक इन्जिनियर शम्भुप्रसाद कोइरीले ज्येष्ठ प्रहरी अतिथि गृह भवन निर्माणसम्बन्धी प्रतिवेदन प्रस्तुत गरेका थिए।

नेपाल प्रहरी कल्याण कोषको आन्तरिक स्रोततबाट निर्मित ज्येष्ठ अतिथि गृह भवन कुल २ करोड ८३ लाख ९२ हजार १ सय ८० रुपैयाँ ३८ पैसामा निर्माण सम्पन्न भएको हो। उक्त ३ तले नवनिर्मित भवनको कुल क्षेत्रफल ६ हजार ९ सय ७३ दशमलव ५५ वर्ग फिट रहेको छ। नवनिर्मित भवनको भुइँ तलामा मेश, इन्टरटेनमेन्ट हल, शौचालय तथा कार्यालय कक्ष रहेको छ। पहिलो र दोस्रो तलामा २ वटा क्याबिन, ३ वटा कमन कोठा र ट्वाइलेट–बाथरूम ब्लकको व्यवस्था गरिएको छ। नवनिर्मित भवनमा १८ जनासम्म बस्ने क्षमता रहेको छ।

उद्घाटन समारोहमा पूर्वप्रहरी महानिरीक्षकहरू, प्रहरी अतिरिक्त महानिरीक्षकहरू, पूर्वप्रहरी अतिरिक्त महानिरीक्षकहरू, प्रविधिक शिक्षा तथा व्यावसायिक तालिम परिषद्का प्रतिनिधिहरू, पूर्वप्रहरी संगठन तथा परिषद्का अध्यक्षहरू, प्रहरी नायब महानिरीक्षकहरू, प्रहरी वरिष्ठ उपरीक्षकहरू, नेपाल प्रहरी अस्पताल स्कुल अफ हेल्थ साइसेन्ज कार्यकारिणी समितिका पदाधिकारीहरू, प्राध्यापक तथा शिक्षकहरूलगायतको उपस्थिति रहेको थियो।