सोलुखुम्बुको लिखुपिके गाउँपालिकाका तत्कालीन प्रशासकीय अधिकृतसहित तीन जनाविरूद्ध भ्रष्टाचार मुद्दा
१७ भदौ २०८० १५:१३
सोलुखुम्बुको लिखुपिके गाउँपालिकाका तत्कालीन प्रमुख प्रशासकीय अधिकृत राजेन्द्र भण्डारीसहित तीन जनाविरूद्ध भ्रष्टाचार मुद्दा दर्ता भएको छ।
अख्तियार दुरूपयोग अनुसन्धान आयोगले आइतबार वडा नम्बर २ का तत्कालीन वडाध्यक्ष रमेशकुमार बस्नेत, तत्कालीन प्रमुख प्रशासकीय अधिकृत राजेन्द्र भण्डारी र तत्कालीन लेखापाल जीवन सुवेदीविरूद्ध विशेष अदालतमा मुद्दा दर्ता गरेको हो।
अख्तियारका प्रवक्ता भोला दाहालका अनुसार वडा कार्यालय भवन निर्माणका लागि निःशुल्क प्राप्त जग्गा किनेको झुटा काजगात तयार गरी ६ लाख रूपैयाँ भुक्तानी लिए दिएको देखिएकाले उनीहरूविरूद्ध मुद्दा दर्ता गरिएको हो।
उनीहरूविरूद्ध परेको उजुरीमाथि अनुसन्धान हुँदा तत्कालीन वडाध्यक्ष बस्नेतले भवन निर्माणका लागि निःशुल्क पाएको जग्गालाई खरिद गरेको भन्दै ६ लाख रूपैयाँ भुक्तानी लिएका थिए।
अधिकृत भण्डारी र लेखापाल सुवेदीले जग्गा खरिद गरेको झुटा व्यहोरा उल्लेख गरी ६ लाख रूपैयाँ दिएका थिए।
दानपत्रबाट जग्गा रजिष्ट्रेसन पास भएको कागजात देखिँदासमेत उनीहरूले दिन नमिल्ने रकम भुक्तानी दिएको अख्तियारको ठहर छ।
उनीहरूविरूद्ध ६ लाख रूपैयाँ बिगो कायम गरी भ्रष्टाचार निवारण ऐन, २०५९ अनुसार सजाय र बिगो असुलउपरको मागदाबी अख्तियारले लिएको छ।
सम्बन्धित समाचार
प्रतिक्रिया